Kwankwaso ya ce be damu da kirana ‘tayar da tayar’ ga mataimakan shugaban ƙasa

Kwankwaso ya ce be damu da kirana ‘tayar da tayar’ ga mataimakan shugaban ƙasa.

Ɗan takarar mataimakin shugaban ƙasa na jam’iyyar NDC, Sanata Rabiu Musa Kwankwaso, ya ce ba ya damuwa da yadda ake kallon mataimakan shugaban ƙasa a matsayin ‘tayar da tayar’ da shugaban ƙasa ke amfani da shi idan akwai matsala.

Fitacciya ta rawaito cewa, Kwankwaso ya bayyana hakan ne a wata tattaunawa da Hukumar Dillancin Labaran Najeriya a Abuja ranar Lahadi, inda ya ce yana da cikakken yaƙinin cewa ɗan takarar shugaban ƙasa na NDC, Peter Obi, zai mutunta yarjejeniyar da suka cimma idan suka samu nasara a zaɓen 2027.

Kwankwaso ya ce matsayin da mataimakin shugaban ƙasa zai samu ya dogara ne da irin shugaban da yake aiki tare da shi.

Ya ce yana da yaƙinin cewa gwamnatin Obi da Kwankwaso za ta kasance bisa haɗin gwiwa da kuma raba nauyin gudanar da ayyuka yadda ya kamata.

Tsohon Gwamnan Kano ya ce ƙwarewar da ya samu a matsayin mataimakin kakakin Majalisar Wakilai, Minista da Gwamna ta shirya shi wajen yin aiki a ƙarƙashin tsarin shugabanci.

Kwankwaso ya ce shugaban ƙasa da ya amince da mataimakinsa kuma ya ba shi ayyuka masu muhimmanci zai iya samun nasarar yin abubuwa da dama domin ƙasar.

Ya ce ba ya tunanin Peter Obi zai mayar da shi gefe idan suka samu nasarar lashe zaɓen shugaban ƙasa na 2027.

Kwankwaso ya tuna cewa lokacin da yake Gwamnan Kano, da gangan ya bai wa mataimakinsa manyan nauyin ayyuka domin hakan ya ba shi da mataimakin nasa damar bayar da gudummawa yadda ya kamata wajen tafiyar da jihar.

Ya ce ya yi amfani da irin wannan tsari lokacin da yake Ministan Tsaro, inda ya bai wa ƙaramin Ministan Tsaro damar kula da wasu fannoni na ma’aikatar.

Tsohon Gwamnan ya ce bai kamata shugabannin siyasa su bari kwaɗayi ko sha’awar mallakar komai su hana gudanar da mulki yadda ya kamata ba.

Ya bayyana cewa shugaban ƙasa ko Gwamna zai iya cimma abubuwa da dama idan ya raba nauyin ayyuka, maimakon ƙoƙarin kula da kowane ɓangare na gwamnati shi kaɗai.

Kwankwaso ya kuma bayyana kwarin gwiwarsa kan Peter Obi, inda ya ce ba mutum ne mai kwaɗayin mulki ba, sai dai mutum ne da ke son barin kyakkyawan tarihi ta fuskar shugabanci.

Ya ce zai gamsu da duk wani nauyin da aka ba shi a matsayin mataimakin shugaban ƙasa, yana mai cewa babban burinsa shi ne yi wa ’yan Najeriya hidima, ba neman cimma wata fa’ida ta kansa ba.

Kwankwaso ya ce nasarar gwamnatin NDC za ta dogara ne da aiki tare, amincewa da juna da kuma yadda shugabannin za su fifita muradun ƙasa sama da burinsu na kashin kansu.

Me Za ku ce?