Tsohon Gwamnan Kano, Sanata Rabiu Musa Kwankwaso, ya bayyana cewa ya amince ya zama mataimakin Peter Obi a zaɓen shugaban ƙasa na 2027 ne saboda tabbatar da daidaiton ƙasa, adalci da kuma samar da sauyin dimokuraɗiyya a Najeriya.
Fitacciya ta rawaito cewa, Kwankwaso ya bayyana hakan ne yayin da ya halarci shirin tattaunawa na Hukumar Dillancin Labaran Najeriya a Abuja ranar Lahadi, inda ya ce abubuwan da ya koya daga zaɓen 2023 sun taimaka masa wajen fahimtar Peter Obi, kuma ya gamsu cewa za su iya yin aiki tare domin amfanin ƙasa.
Kwankwaso ya ce ɗaya daga cikin dalilan da suka sa ya amince da wannan matsaya shi ne bukatar barin yankin Kudu ya ci gaba da riƙe shugabancin ƙasa na wani wa’adi bayan kammala wa’adin shekaru takwas na tsohon Shugaban Ƙasa Muhammadu Buhari.
Ya ce a zaɓen 2023 sun yi ƙoƙarin yin aiki tare, amma a lokacin bai san Peter Obi sosai ba. Sai dai ya ce a cikin shekaru huɗu da suka gabata ya samu damar ƙara fahimtar Obi kuma ya gano cewa mutum ne da zai iya yin aiki tare da shi.
Kwankwaso ya ce an cimma wannan matsaya ne bayan tuntubar mambobin ƙungiyar Kwankwasiyya, magoya bayan jam’iyyar NNPP da kuma ƙungiyar Obidient Movement.
Ya ce waɗannan ƙungiyoyi sun yi imanin cewa Najeriya na buƙatar tikitin siyasa mai daidaita yankuna, wanda zai iya samun goyon baya daga Arewa da Kudu.
Tsohon Ministan Tsaro ya ce matsalolin tsaro da ƙasar ke fuskanta, raguwar samar da amfanin gona da kuma lalacewar ababen more rayuwa sun ƙara masa ƙwarin gwiwar marawa tsarin siyasar da zai kawo sauyin dimokuraɗiyya baya.
Ya ce matsin tattalin arziƙi ya fi shafar manoma, musamman a Arewacin Najeriya, inda samar da amfanin gona ya ƙara zama mai wahala da rashin riba.
Kwankwaso ya kuma ce lalacewar ababen more rayuwa a sassan ƙasar, ban da wasu wurare kamar Legas, na daga cikin dalilan da suka sa ya amince da haɗa kai da Obi.
Ya ce halin da Najeriya ke ciki a yanzu na buƙatar irin sauyin dimokuraɗiyyar da ’yan Najeriya suka nema a shekarar 2015, yana mai cewa buƙatar irin wannan sauyi ta fi zama dole a yanzu.
Kwankwaso ya bayyana tikitin Obi da Kwankwaso a matsayin haɗin gwiwar da zai samar da daidaiton yankuna, ƙwarewa da kuma amana.
Ya ce babu wani tikitin siyasa da zai iya doke nasu wajen amana, ƙwarewa da kishin ƙasa, tare da tausayawa talakawan da ke fama da matsin rayuwa.
Kwankwaso ya ce amincewarsa ta zama mataimakin shugaban ƙasa ba koma baya ba ce a gare shi, duk da irin mukaman da ya taɓa riƙewa da suka haɗa da mataimakin kakakin Majalisar Wakilai, Gwamna, Minista da Sanata.
Ya ce bai taɓa zama mataimakin shugaban ƙasa ba, don haka ganin wannan matsayi a matsayin mataki ne na ci gaba a rayuwarsa ta siyasa.
Ya jaddada cewa shawarar tasa ta dogara ne kan abin da ya kira maslahar ƙasa, ba wai burin kansa ba, yana mai cewa riƙe mukamin gwamnati dama ce ta yi wa al’umma hidima.
Kwankwaso ya ce yarjejeniyar da aka cimma da Obi ita ce Kudu ta samar da shugaban ƙasa na wa’adi guda, daga nan kuma tsarin siyasar ya koma Arewa.
Ya kawo misalin wasu shugabannin siyasa na tarihi da suka amince da mukaman da suke ƙasa da abin da za su iya samu, ciki har da Sir Ahmadu Bello, wanda ya zaɓi ci gaba da kasancewa Firimiya na Arewacin Najeriya maimakon zama Firayim Minista.
Ya ce ya kamata ’yan Najeriya su fahimci cewa ana iya yin hidima a matakai daban-daban, tun daga Kansila, Shugaban Ƙaramar Hukuma, ɗan majalisa, Gwamna, Minista, mataimakin shugaban ƙasa har zuwa shugaban ƙasa.
Kwankwaso ya ce ya kamata shugabannin siyasa su kasance a shirye su yi hidima a duk inda aka ga sun fi dacewa, maimakon ɗaukar wasu mukamai a matsayin waɗanda suka yi ƙasa da matsayinsu.
Ya kuma musanta zargin da wasu abokan hamayyarsa ke yi na cewa tattaunawar da ya yi da jam’iyyar APC ko wasu jam’iyyu ta dogara ne da samun tikitin shugaban ƙasa ko mataimakinsa.
Ya ce tattaunawar da ya yi da Shugaba Bola Tinubu bayan zaɓen 2023 ta shafi yadda za su yi aiki tare ne, ba wai barin NNPP ko neman wani mukami ba.
Kwankwaso ya ce ya taɓa taka muhimmiyar rawa wajen nasarar APC a zaɓen 2015, musamman sakamakon da aka samu a Kano, amma daga baya ya nuna rashin jin daɗinsa kan yadda shugabancin jam’iyyar ya tafiyar da al’amura.
Ya ce amincewarsa da haɗin gwiwar Obi-Kwankwaso ta ƙara ƙarfi ne saboda abin da ya bayyana a matsayin ƙudurin Obi na tabbatar da adalci, gaskiya da haɗin kan ƙasa.
Ya ce tsarin zai kuma tabbatar da cewa Arewa ba za ta samu kanta a cikin wani hali na rashin adalci ba, yana mai cewa fahimtar yin wa’adi guda na shugaban ƙasa na da muhimmanci wajen samun amincewar magoya bayansa.
Kwankwaso ya ce yana da yaƙinin cewa Obi zai mutunta yarjejeniyar da suka cimma, kuma zai yi aiki da shi a matsayin abokin haɗin gwiwa, ba wai ya ɗauke shi a matsayin “tayar da tayar” ba.
Ya ce gogewarsa a matsayin mataimakin kakakin Majalisar Wakilai, Minista da Gwamna ta koya masa muhimmancin bai wa mataimaka damar gudanar da ayyukansu yadda ya kamata.
A cewarsa, shugaban ƙasa ko Gwamna da ya bai wa mataimakinsa ayyuka masu ma’ana yana ƙarfafa gwamnati ne, domin nasarar mataimakin za ta amfani shugaban.
Kwankwaso ya ce saboda haka ya gamsu da tsarin da aka tsara, kuma yana da yaƙinin cewa Obi zai ba shi damar bayar da gagarumar gudummawa wajen tafiyar da gwamnati.
Ya kuma ce gwamnatin NDC za ta bai wa ƙwarewa muhimmanci wajen naɗa Ministoci da sauran jami’an gwamnati, inda za a raba iko bisa buƙatun ƙasa, ba wai domin biyan bukatun siyasa ba.
Ya ce za a tabbatar da samun ƙwararrun mutane, domin shugaban ƙasa da mataimakinsa kaɗai ba za su iya magance dukkan matsalolin ƙasar ba.
Kwankwaso ya ce gwamnatin NDC za ta buƙaci ƙwararrun masana, kwararru da kuma ’yan siyasa masu gogewa domin tunkarar matsalolin Najeriya masu sarkakiya.
Me Za ku ce?
0 Comments